ಐಪಿಎಲ್ 2026ರ ಇಂದಿನ ಪಂದ್ಯದಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಅದ್ಭುತ ಪ್ರದರ್ಶನ ನೀಡಿದರೂ, ಕೇವಲ 1 ರನ್ ಅಂತರದಲ್ಲಿ ತಮ್ಮ 66ನೇ ಅರ್ಧಶತಕವನ್ನು ಪೂರೈಸುವಲ್ಲಿ ವಿಫಲರಾದರು. ಭರ್ಜರಿ ಫಾರ್ಮ್ನಲ್ಲಿದ್ದ ಕೊಹ್ಲಿ 49 ರನ್ ಗಳಿಸಿದ್ದಾಗ ದುರದೃಷ್ಟವಶಾತ್ ಕ್ಯಾಚ್ ನೀಡಿ ಔಟಾದರು. ಈ ವೇಳೆ ಇಡೀ ಕ್ರೀಡಾಂಗಣದಲ್ಲಿ ಮೌನ ಆವರಿಸಿತು. ಸ್ಥಿರವಾದ ಆಟದ ಮೂಲಕ ತಂಡವನ್ನು ಗೆಲುವಿನತ್ತ ಮುನ್ನಡೆಸುತ್ತಿದ್ದ ಕೊಹ್ಲಿ, ಅರ್ಧಶತಕದ ಹೊಸ್ತಿಲಲ್ಲಿ ಎಡವಿದ್ದು ಅಭಿಮಾನಿಗಳಿಗೆ ತೀವ್ರ ನಿರಾಸೆ ತಂದಿತು.
ಕೊಹ್ಲಿ ಔಟಾದ ತಕ್ಷಣ ಗ್ಯಾಲರಿಯಲ್ಲಿದ್ದ ಅವರ ಪತ್ನಿ ಅನುಷ್ಕಾ ಶರ್ಮಾ ಅವರ ಪ್ರತಿಕ್ರಿಯೆ ಕ್ಯಾಮೆರಾ ಕಣ್ಣುಗಳಲ್ಲಿ ಸೆರೆಯಾಗಿದ್ದು, ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ವಿರಾಟ್ 49 ರನ್ಗೆ ವಿಕೆಟ್ ಒಪ್ಪಿಸುತ್ತಿದ್ದಂತೆ ಅನುಷ್ಕಾ ದಿಕ್ಕೇ ತೋಚದಂತೆ ಸ್ತಬ್ಧರಾದರು. ಮುಖದ ಮೇಲೆ ಅಸಮಾಧಾನ ಮತ್ತು ಬೇಸರ ಎದ್ದುಕಾಣುತ್ತಿತ್ತು. ಪ್ರತಿ ಪಂದ್ಯದಲ್ಲೂ ಪತಿಗೆ ಬೆಂಬಲವಾಗಿ ನಿಲ್ಲುವ ಅನುಷ್ಕಾ, ಈ ಮೈಲಿಗಲ್ಲು ಮಿಸ್ ಆಗಿದ್ದನ್ನು ಕಂಡು ಕಣ್ಣೀರು ತಡೆಹಿಡಿಯಲು ಯತ್ನಿಸುತ್ತಿದ್ದ ದೃಶ್ಯ ಅಭಿಮಾನಿಗಳ ಮನ ಕಲಕುವಂತಿತ್ತು.
ವಿರಾಟ್ ಕೊಹ್ಲಿ ಪೆವಿಲಿಯನ್ಗೆ ಮರಳುವಾಗ ಅನುಷ್ಕಾ ಚಪ್ಪಾಳೆ ತಟ್ಟುವ ಮೂಲಕ ಪತಿಗೆ ಧೈರ್ಯ ತುಂಬುವ ಕೆಲಸ ಮಾಡಿದರು. ಪಂದ್ಯದ ನಂತರ ಮಾತನಾಡಿದ ಕೊಹ್ಲಿ, "ವೈಯಕ್ತಿಕ ದಾಖಲೆಗಳಿಗಿಂತ ತಂಡದ ಗೆಲುವು ಮುಖ್ಯ, ಆದರೆ ಅರ್ಧಶತಕದ ಸಮೀಪ ಬಂದು ಔಟಾಗಿದ್ದು ಸ್ವಲ್ಪ ಬೇಸರ ತಂದಿದೆ" ಎಂದು ಹಂಚಿಕೊಂಡಿದ್ದಾರೆ. ಈ ಪಂದ್ಯವು ಕೊಹ್ಲಿ ಅವರ ಅದ್ಭುತ ಬ್ಯಾಟಿಂಗ್ ತಂತ್ರಗಾರಿಕೆಗೆ ಸಾಕ್ಷಿಯಾದರು, ಕೇವಲ ಒಂದು ರನ್ನಿಂದ ದಾಖಲೆ ಕೈತಪ್ಪಿದ್ದು ಮಾತ್ರ ಅಭಿಮಾನಿಗಳ ಪಾಲಿಗೆ ಇಂದಿನ ಕಹಿ ಸುದ್ದಿಯಾಗಿ ಉಳಿಯಿತು.
