ಸಾಮಾನ್ಯವಾಗಿ ಅಡುಗೆ ಮನೆಯಲ್ಲಿ ಚಿಕನ್ ತಯಾರಿಸುವಾಗ ಮಾಂಸದ ಭಾಗವನ್ನು ಬಳಸಿ, ಮೂಳೆಗಳನ್ನು ಕಸದ ಬುಟ್ಟಿಗೆ ಎಸೆಯುವುದು ಬಹುತೇಕರ ರೂಢಿ. ಆದರೆ, ಚಿಕನ್ ಮೂಳೆಗಳನ್ನು ಎಸೆಯುವ ಮುನ್ನ ಅವುಗಳಲ್ಲಿ ಅಡಗಿರುವ ಆರೋಗ್ಯದ ರಹಸ್ಯವನ್ನು ತಿಳಿಯುವುದು ಮುಖ್ಯ. ಚಿಕನ್ ಮೂಳೆಗಳನ್ನು ಚೆನ್ನಾಗಿ ಕುದಿಸಿ ತಯಾರಿಸುವ ‘ಬೋನ್ ಬ್ರಾತ್’ (Bone Broth) ಅಥವಾ ಮೂಳೆಯ ಸೂಪ್, ದೇಹಕ್ಕೆ ರೋಗನಿರೋಧಕ ಶಕ್ತಿ ನೀಡುವ ಅತ್ಯುತ್ತಮ ಪೌಷ್ಟಿಕ ಆಹಾರಗಳಲ್ಲಿ ಒಂದಾಗಿದೆ ಎಂದು ಆರೋಗ್ಯ ತಜ್ಞರು ಅಭಿಪ್ರಾಯಪಡುತ್ತಾರೆ.
ಚಿಕನ್ ಮೂಳೆಗಳಲ್ಲಿ ಕೊಲಾಜನ್ (Collagen) ಮತ್ತು ಗ್ಲುಕೋಸಮೈನ್ನಂತಹ ಪ್ರಮುಖ ಅಂಶಗಳು ಸಮೃದ್ಧವಾಗಿರುತ್ತವೆ. ಮೂಳೆಗಳನ್ನು ನಿಧಾನ ಉರಿಯಲ್ಲಿ ದೀರ್ಘಕಾಲ ಕುದಿಸಿದಾಗ, ಈ ಪೋಷಕಾಂಶಗಳು ನೀರಿನಲ್ಲಿ ಕರಗುತ್ತವೆ. ಈ ಸೂಪ್ ಅನ್ನು ನಿಯಮಿತವಾಗಿ ಕುಡಿಯುವುದರಿಂದ ಕೀಲು ನೋವು, ಮೊಣಕಾಲು ನೋವು ಕಡಿಮೆಯಾಗುವುದಲ್ಲದೆ, ಮೂಳೆಗಳು ಬಲಗೊಳ್ಳುತ್ತವೆ. ಅಷ್ಟೇ ಅಲ್ಲದೆ, ಇದು ಚರ್ಮದ ಸ್ಥಿತಿಸ್ಥಾಪಕತ್ವವನ್ನು ಕಾಯ್ದುಕೊಂಡು, ವಯಸ್ಸಾದಂತೆ ಮುಖದ ಮೇಲಾಗುವ ಸುಕ್ಕುಗಳನ್ನು ತಡೆಯಲು ನೆರವಾಗುತ್ತದೆ.
ಜೀರ್ಣಕ್ರಿಯೆಯ ತೊಂದರೆಯಿಂದ ಬಳಲುತ್ತಿರುವವರಿಗೆ ಚಿಕನ್ ಮೂಳೆಯ ಸೂಪ್ ಒಂದು ಉತ್ತಮ ಮನೆಮದ್ದಾಗಿದೆ. ಇದರಲ್ಲಿರುವ ಅಮೈನೋ ಆಮ್ಲಗಳು ಕರಳಿನ ಆರೋಗ್ಯವನ್ನು ಸುಧಾರಿಸಿ, ಗ್ಯಾಸ್ ಮತ್ತು ಅಸಿಡಿಟಿ ಸಮಸ್ಯೆಯನ್ನು ದೂರ ಮಾಡುತ್ತದೆ. ಶೀತ, ಕೆಮ್ಮು ಅಥವಾ ಜ್ವರ ಬಂದಾಗ ಬಿಸಿಬಿಸಿಯಾದ ಚಿಕನ್ ಬೋನ್ ಸೂಪ್ ಕುಡಿಯುವುದರಿಂದ ಗಂಟಲು ನೋವು ಶಮನವಾಗಿ, ದೇಹಕ್ಕೆ ತಕ್ಷಣದ ಶಕ್ತಿ ಸಿಗುತ್ತದೆ. ಆದ್ದರಿಂದ ಇನ್ಮುಂದೆ ಚಿಕನ್ ಮೂಳೆಗಳನ್ನು ವೇಸ್ಟ್ ಮಾಡದೆ, ಆರೋಗ್ಯಕರ ಸೂಪ್ ಮಾಡಿ ಸವಿಯಿರಿ.
