ಲಾಟರಿ ಮೂಲಕ ಕೋಟ್ಯಾಧಿಪತಿಯಾಗುವ ಆಸೆಗೆ ಬಿದ್ದ ಪಶ್ಚಿಮ ಬೆಂಗಳೂರಿನ ಇಬ್ಬರು ನಾಗರಿಕರು ನಕಲಿ ಕೇರಳ ಲಾಟರಿ ಜಾಲಕ್ಕೆ ಸಿಲುಕಿ ಬರೋಬ್ಬರಿ 13.71 ಲಕ್ಷ ರೂಪಾಯಿಗಳನ್ನು ಕಳೆದುಕೊಂಡಿದ್ದಾರೆ. ಈ ಸಂಬಂಧ ಬೆಂಗಳೂರಿನ ಪಶ್ಚಿಮ ವಿಭಾಗದ ಸೈಬರ್ ಕ್ರೈಂ ಪೊಲೀಸ್ ಠಾಣೆಯಲ್ಲಿ ಪ್ರತ್ಯೇಕ ಪ್ರಕರಣಗಳು ದಾಖಲಾಗಿದ್ದು, ಪೊಲೀಸರು ವಂಚಕರ ಪತ್ತೆಗಾಗಿ ಬಲೆ ಬೀಸಿದ್ದಾರೆ.
ವಂಚನೆಗೆ ಒಳಗಾದವರಲ್ಲಿ ವಳಗೇರಹಳ್ಳಿಯ 60 ವರ್ಷದ ಎನ್ಜಿಒ ಉದ್ಯೋಗಿಯೊಬ್ಬರು 7.45 ಲಕ್ಷ ರೂಪಾಯಿ ಕಳೆದುಕೊಂಡಿದ್ದರೆ, ಮಾರುತಿ ನಗರದ 52 ವರ್ಷದ ರೈತರೊಬ್ಬರು 6.26 ಲಕ್ಷ ರೂಪಾಯಿಗಳನ್ನು ಕಳೆದುಕೊಂಡು ಕಂಗಾಲಾಗಿದ್ದಾರೆ.
ಸೈಬರ್ ವಂಚನೆ ನಡೆದಿದ್ದು ಹೇಗೆ?
ವಂಚಕರು ‘ಕೇರಳ ಜ್ಯಾಕ್ಪಾಟ್’ ಅಥವಾ ‘ಕೇರಳ ಸ್ಟೇಟ್ ಲಾಟರಿ’ ಸಂಸ್ಥೆಯ ಪ್ರತಿನಿಧಿಗಳ ಸೋಗಿನಲ್ಲಿ ವಾಟ್ಸಾಪ್ ಕರೆಗಳ ಮೂಲಕ ಇಬ್ಬರು ಸಂತ್ರಸ್ತರನ್ನು ಸಂಪರ್ಕಿಸಿದ್ದರು. ನಿಮಗೆ 8 ಲಕ್ಷ ರೂಪಾಯಿಗಳ ಲಾಟರಿ ಒಲಿದಿದೆ ಎಂದು ನಂಬಿಸಿದ್ದರು. ತಮ್ಮ ಲಾಟರಿ ಫಲಿತಾಂಶವನ್ನು ಖಚಿತಪಡಿಸಿಕೊಳ್ಳಲು ವಂಚಕರು thekeralajackpotresult.online ಎಂಬ ವೆಬ್ಸೈಟ್ ಲಿಂಕ್ ಒಂದನ್ನು ಕಳುಹಿಸಿಕೊಟ್ಟಿದ್ದರು. ಸಂತ್ರಸ್ತರು ಆ ಲಿಂಕ್ ಕ್ಲಿಕ್ ಮಾಡಿದಾಗ, ಅವರ ಹೆಸರಿನಲ್ಲೇ ಲಾಟರಿ ಲಭಿಸಿರುವಂತೆ ನಕಲಿ ವೆಬ್ಸೈಟ್ ಅನ್ನು ವಿನ್ಯಾಸಗೊಳಿಸಲಾಗಿತ್ತು. ಈ ವೆಬ್ಸೈಟ್ ಡೊಮೇನ್ ಅನ್ನು ಏಪ್ರಿಲ್ 3, 2025 ರಂದು ‘ಧೈರ್ಯ ರೆಡ್ಡಿ’ ಎಂಬ ಹೆಸರಿನಲ್ಲಿ ನಕಲಿ ವಿಳಾಸ ನೀಡಿ ನೋಂದಾಯಿಸಲಾಗಿತ್ತು ಎಂದು ತನಿಖೆಯಿಂದ ತಿಳಿದುಬಂದಿದೆ.
ಸಂತ್ರಸ್ತರ ನಂಬಿಕೆಯನ್ನು ಗಳಿಸಲು ವಂಚಕರು ಭಾರತೀಯ ರಿಸರ್ವ್ ಬ್ಯಾಂಕ್ ಹೆಸರಿನಲ್ಲಿದ್ದ ನಕಲಿ ಪತ್ರಗಳನ್ನು ಸೃಷ್ಟಿಸಿ ಕಳುಹಿಸಿದ್ದರು. ತದನಂತರ, ಬಹುಮಾನದ ಹಣವನ್ನು ಬಿಡುಗಡೆ ಮಾಡಲು ಜಿಎಸ್ಟಿ, ಟಿಡಿಎಸ್ ಮತ್ತು ಆದಾಯ ತೆರಿಗೆ ಶುಲ್ಕಗಳನ್ನು ಪಾವತಿಸುವಂತೆ ಎನ್ಜಿಒ ಉದ್ಯೋಗಿಗೆ ಸೂಚಿಸಲಾಗಿತ್ತು.
ಮತ್ತೊಂದೆಡೆ, ರೈತನಿಗೆ ಜಿಎಸ್ಟಿ ಪಾವತಿಸಿ ಆರ್ಬಿಐನಿಂದ ನಿರಾಕ್ಷೇಪಣಾ ಪತ್ರ ಪಡೆಯಲು ಕೋರಲಾಗಿತ್ತು. ಜೊತೆಗೆ ಲಾಟರಿ ಹಣವು ಥಾಯ್ ಭಾಟ್ ಕರೆನ್ಸಿಯಲ್ಲಿದೆ ಎಂದು ಸುಳ್ಳು ಹೇಳಿ, ಕರೆನ್ಸಿ ಪರಿವರ್ತನೆ ಶುಲ್ಕವನ್ನೂ ವಸೂಲಿ ಮಾಡಲಾಗಿತ್ತು. ಇದನ್ನು ನಿಜವೆಂದು ನಂಬಿದ ಇಬ್ಬರೂ ಹಂತ ಹಂತವಾಗಿ ಲಕ್ಷಾಂತರ ರೂಪಾಯಿ ಹಣವನ್ನು ವರ್ಗಾವಣೆ ಮಾಡಿದ್ದರು. ಹಣ ತಲುಪಿದ ನಂತರ ವಂಚಕರು ಸಂಪರ್ಕಕ್ಕೆ ಸಿಗದಿದ್ದಾಗ ತಮಗೆ ವಂಚನೆಯಾಗಿರುವುದು ಬೆಳಕಿಗೆ ಬಂದಿದೆ.
ಕಾನೂನಿನ ಲೋಪದೋಷಗಳು
ಕರ್ನಾಟಕದಲ್ಲಿ 2007 ರಿಂದಲೇ ಲಾಟರಿ ಮಾರಾಟವನ್ನು ಸಂಪೂರ್ಣವಾಗಿ ನಿಷೇಧಿಸಲಾಗಿದೆ. ಆದಾಗ್ಯೂ, ಲಾಟರಿ ಕಾನೂನುಬದ್ಧವಾಗಿರುವ ಇತರ ರಾಜ್ಯಗಳಿಗೆ ಉದಾಹರಣೆಗೆ ಕೇರಳಕ್ಕೆ ತೆರಳಿ ಲಾಟರಿ ಟಿಕೆಟ್ ಖರೀದಿಸಲು ಜನರಿಗೆ ಯಾವುದೇ ನಿರ್ಬಂಧವಿಲ್ಲ. ಆದರೆ, ಕೇರಳ ಲಾಟರಿಗಳು ಯಾವಾಗಲೂ ಭೌತಿಕ ರೂಪದಲ್ಲಿ ಮಾತ್ರ ಮಾರಾಟವಾಗುತ್ತವೆ ಮತ್ತು ಅವುಗಳನ್ನು ಎಂದಿಗೂ ಆನ್ಲೈನ್ನಲ್ಲಿ ಮಾರಾಟ ಮಾಡಲಾಗುವುದಿಲ್ಲ. ರಾಜ್ಯದಲ್ಲಿ ನಿಷೇಧವಿದ್ದರೂ ಕೆಲವು ಕಡೆ ಕಳ್ಳಮಾರ್ಗದಲ್ಲಿ ಕೇರಳ ಲಾಟರಿ ಟಿಕೆಟ್ಗಳನ್ನು ಮಾರಾಟ ಮಾಡುತ್ತಿರುವ ವರದಿಗಳಿದ್ದು, ಸಾರ್ವಜನಿಕರು ಆನ್ಲೈನ್ ಲಾಟರಿ ಆಮಿಷಗಳಿಗೆ ಬಲಿಯಾಗಬಾರದು ಎಂದು ಸೈಬರ್ ಪೊಲೀಸರು ಎಚ್ಚರಿಸಿದ್ದಾರೆ.
