ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ ಪ್ಯಾನ್-ಇಂಡಿಯಾ ಸಿನಿಮಾ ‘ಟಾಕ್ಸಿಕ್’ ಬಗ್ಗೆ ಪ್ರತಿದಿನ ಒಂದಿಲ್ಲೊಂದು ಸುದ್ದಿಗಳು ಹರಿದಾಡುತ್ತಲೇ ಇವೆ. ‘ಕೆಜಿಎಫ್’ ಸರಣಿಯ ಬೃಹತ್ ಯಶಸ್ಸಿನ ನಂತರ ಯಶ್ ಅವರ ಈ ಹೊಸ ಚಿತ್ರದ ಮೇಲೆ ಕೇವಲ ದಕ್ಷಿಣ ಭಾರತವಷ್ಟೇ ಅಲ್ಲ, ಇಡೀ ದೇಶದ ಸಿನಿಪ್ರೇಮಿಗಳು ಕಣ್ಣಿಟ್ಟಿದ್ದಾರೆ. ಆದರೆ, ಚಿತ್ರದ ಬಗ್ಗೆ ಬಿಲ್ಡಪ್ ಹೆಚ್ಚಾಗುತ್ತಿರುವಂತೆಯೇ, ಬಿ-ಟೌನ್ ಅಂಗಳದಲ್ಲಿ ಒಂದು ಅಚ್ಚರಿಯ ವದಂತಿಯೊಂದು ಭಾರೀ ಸದ್ದು ಮಾಡುತ್ತಿದೆ.
ದಕ್ಷಿಣ ಭಾರತದ ಸಿನಿಮಾಗಳು, ವಿಶೇಷವಾಗಿ ಕನ್ನಡದ ಸಿನಿಮಾಗಳು ಬಾಲಿವುಡ್ ಬಾಕ್ಸ್ ಆಫೀಸ್ನಲ್ಲಿ ಸೃಷ್ಟಿಸುತ್ತಿರುವ ಸುನಾಮಿ ಹಾಗೂ ದಾಖಲೆಗಳಿಂದ ಹಿಂದಿ ಚಿತ್ರರಂಗದ ಕೆಲವರಿಗೆ ನುಂಗಲಾರದ ತುತ್ತಾಗಿದೆ ಎಂಬ ಮಾತುಗಳು ಹಿಂದಿನಿಂದಲೂ ಇವೆ. ಈಗ ಇದೇ ಕಾರಣಕ್ಕೆ, ಯಶ್ ಅವರ ‘ಟಾಕ್ಸಿಕ್’ ಚಿತ್ರದ ಹಾದಿಯನ್ನು ಹೇಗಾದರೂ ಮಾಡಿ ತಪ್ಪಿಸಲು ಅಥವಾ ಅದರ ಯಶಸ್ಸಿಗೆ ಅಡ್ಡಿಯುಂಟು ಮಾಡಲು ಬಾಲಿವುಡ್ನ ಕೆಲ ಪ್ರಭಾವಿ ಮಂದಿ ರಹಸ್ಯವಾಗಿ ಪ್ಲ್ಯಾನ್ ಮಾಡುತ್ತಿದ್ದಾರೆ ಎಂಬ ಗುಮಾನಿ ಗಾಂಧಿನಗರದಿಂದ ಹಿಡಿದು ಮುಂಬೈವರೆಗೂ ಹಬ್ಬಿದೆ.
ಚಿತ್ರದ ಬಿಡುಗಡೆಗೆ ಮುನ್ನವೇ ನೆಗೆಟಿವ್ ಪ್ರಚಾರ ಮಾಡುವುದು, ಚಿತ್ರದ ಬಗ್ಗೆ ಅಪಪ್ರಚಾರ ಮಾಡುವುದು ಅಥವಾ ಥಿಯೇಟರ್ಗಳ ಹಂಚಿಕೆಯಲ್ಲಿ ತೊಂದರೆ ಕೊಡುವಂತಹ ತಂತ್ರಗಳನ್ನು ರೂಪಿಸುತ್ತಿದ್ದಾರೆ ಎನ್ನಲಾಗುತ್ತಿದೆ. ಆದರೆ, ಈ ಯಾವುದೇ ವದಂತಿಗಳ ಬಗ್ಗೆ ತಲೆಕೆಡಿಸಿಕೊಳ್ಳದ ಯಶ್ ಅಭಿಮಾನಿಗಳು ಮಾತ್ರ, ‘ಟಾಕ್ಸಿಕ್’ ಚಿತ್ರವು ತನ್ನ ಕಂಟೆಂಟ್ ಮೂಲಕವೇ ಈ ಎಲ್ಲಾ ಕುತಂತ್ರಗಳಿಗೆ ಉತ್ತರ ನೀಡಲಿದ್ದು, ಬಾಲಿವುಡ್ನಲ್ಲಿ ಮತ್ತೊಮ್ಮೆ ಧೂಳೆಬ್ಬಿಸುವುದು ಖಚಿತ ಎಂಬ ಅಚಲ ವಿಶ್ವಾಸದಲ್ಲಿದ್ದಾರೆ.
