ಬೆಂಗಳೂರಿನಲ್ಲಿ ಜಾನ್ಸಿ ಬಿ.ವಿ. ಎಂಬ ಮಹಿಳೆ ತಮ್ಮ ಬದುಕಿನ ಕಷ್ಟಗಳನ್ನು ಮೆಟ್ಟಿ ನಿಂತು ಇಂದು ಮತ್ತಷ್ಟು ಮಹಿಳೆಯರಿಗೆ ಸ್ವಾವಲಂಬನೆಯ ದಾರಿ ತೋರಿಸುತ್ತಿದ್ದಾರೆ. ತಮ್ಮಲ್ಲಿದ್ದ ಕಲೆಯನ್ನು ಇತರ ಮಹಿಳೆಯರಿಗೆ ಕಲಿಸುವ ಮೂಲಕ 50ಕ್ಕೂ ಅಧಿಕ ಮಹಿಳೆಯರ ಬದುಕಿನಲ್ಲಿ ಬದಲಾವಣೆ ತಂದಿದ್ದಾರೆ.
ಜಾನ್ಸಿ ಅವರು ಕೇವಲ 12ನೇ ವಯಸ್ಸಿನಲ್ಲೇ ತಂದೆಯನ್ನು ಕಳೆದುಕೊಂಡರು. ಬಳಿಕ ತಾಯಿಯ ಕಷ್ಟ, ಕಣ್ಣೀರು ಮತ್ತು ಕುಟುಂಬದ ಆರ್ಥಿಕ ಸಂಕಷ್ಟಗಳನ್ನು ಹತ್ತಿರದಿಂದ ನೋಡುತ್ತಾ ಬೆಳೆದರು. ಆದರೆ ಕಷ್ಟಗಳನ್ನೇ ಜೀವನದ ಅಂತ್ಯವೆಂದು ಭಾವಿಸದೆ, ಅವುಗಳನ್ನು ಸವಾಲಾಗಿ ಸ್ವೀಕರಿಸಿ ಸ್ವಾವಲಂಬಿ ಬದುಕಿನತ್ತ ಹೆಜ್ಜೆ ಹಾಕಿದರು.
ತಾವು ಕಲಿತ ಕಲೆ ಮತ್ತು ಕೌಶಲ್ಯವನ್ನು ತಮ್ಮಲ್ಲೇ ಉಳಿಸಿಕೊಳ್ಳದೆ, ಅಗತ್ಯವಿರುವ ಮಹಿಳೆಯರಿಗೆ ಉಚಿತವಾಗಿ ಹಂಚಿಕೊಳ್ಳಲು ಮುಂದಾದರು. ಇದರ ಮೂಲಕ 50ಕ್ಕೂ ಅಧಿಕ ಮಹಿಳೆಯರಿಗೆ ಜೀವನೋಪಾಯದ ಹೊಸ ದಾರಿ ಸಿಕ್ಕಿದೆ. ಜಾನ್ಸಿ ಅವರ ಈ ಸೇವಾ ಮನೋಭಾವ ಮತ್ತು ಹೋರಾಟದ ಬದುಕು, ಸ್ವಾವಲಂಬನೆಯ ಕನಸು ಕಾಣುವ ಅನೇಕ ಮಹಿಳೆಯರಿಗೆ ಪ್ರೇರಣೆಯಾಗಿದೆ.
